«Смиротворец» вожвылъяськонын «Кто мы» телеочерк нырысетӥ инты басьтӥз

«Мынам Удмуртие» телерадокомпанилэн шыкысаз — эшшо одӥг вормон. «Смиротворец» вожвылъяськонлэн Приволжск федерал округъя ортчем люкетаз «Кто мы» ӵектос вылӥ дунъет басьтӥз — йӧскалык кусыпъёсты возьматон-югдытон уж понна «Телевидение» номинациын нырысетӥ интыен данъямын.

«Смиротворец» вожвылъяськон ивор сӧзнэтын калык герӟетъёсты югдытонлы сӥзем пӧртэм ужъёсты дунъя. Конкурсэ пырисько быдэс Россиысь газет-журналъёс, теле- но радио программаос но передачаос. Одӥг валтӥсь куронэз гинэ  — уж кунамы улӥсь пӧртэм калыкъёсты, улон-вылонзэс, 

вӧсьлыксэс, лулчеберетсэс югдытыны кулэ. Приволжьея ортчем ужрадэ туэ ивор вӧлмытонъя 70 огазеяськонъёс пыриськизы, 700 пала ужъёс эскеремын.

Соос пӧлысь «Телевидение» номинацын «Кто мы» ӵектос нырысетӥ инты басьтӥз. Нош кудӥз, кин сярысь но малы сӥзем программа вормиз — ӧз шараялэ. Дунъясьёс трос выпускъёссэ эскериллям, ваньмыз ик ужъёс кельшиллям — вера «Мынам Удмуртие» телерадиокомпаниысь журналист, «Кто мы» ӵектослэн авторез Елена Слесарева.

Пусйымон, «Кто мы» ӵектос улсын потӥсь телепрограммаос ог дас ар ӵоже Элькун но Росси конкурсъёсын трос вормонъёс басьтӥз ни, эшшо тросгес пӧртэм номинациосын тужгес усто фильмен нимамын. «Кто мы» телеочерк пӧртэм аръёсы-дауръёсы калыкез бугыртэм, сюлмаськытэм ужпумъёсты возьматонлы сӥземын. Соос пӧлын — Кузёбай Гердлэн, Ашальчи

 Окилэн, Флор Васильевлэн, Михаил Федотовлэн улонэзлы но творчествоезлы сӥзем выпускъёс, «Мултан уж», Башкириын улӥсь удмуртъёслэн «Элен вӧсь», язычникъёс, пӧйшуран йылолъёс, ӝук вӧсян, Элькунысь пӧртэм ёросъёсын улӥсь удмуртъёслэн кылан-буранъёссы но трос мукет. Историез тодон — ортчемезлэн но туала улонлэн герӟетэз луэ, юрттэ адямилы ас улоназ интызэ шедьтыны, мукет адямиосын кусып тупатыны. Историын котькуд пыры бадӟым инты басьтэ — верало «Кто мы» телеочерк бордын тыршисьёс Елена Слесарева(автор), Анатолий Добряков (монтажёр) но Юрий Егоров (оператор).

Мынам УдмуртиеТодады вайытом, программа эфире потэ котькуд пуксёнэ 20 час но 30 минутэ, вирнуналъёсы 10 час но 30 минутэ но кӧснуналъёсы — 18 час но 30 минутэ. Тодматскыны но учкыны луэ озьы ик «Мынам Удмуртие» телерадиокомпанилэн сайтаз.