Пеймыт, дэри но кышкыт. Таӵе кылъёсын суредало дэбесъёс черкогуртысь Полевой урамзэс. Корка пуктыны музъем висъяло, нош сюрес — ӧвӧл, — шуо татын улӥсьёс. Озьы ик урамзэс югдытонъя но секыт югдур кылдэмын. Ку потозы Дэбесысь Полевой урамын улӥсьёс "пеймыт выжыкылысь" — югыт но ӟеч улонэ — тодӥз Вероника Ваулина.
ВЕРОНИКА ВАУЛИНА, КОРРЕСПОНДЕНТ: «Дэбес черкогуртын Полевой нимо урамын куамынлэсь трос коркаос. Ӝыныезлэсь трос татын егит семьяос ӝутӥсько. Но сюрес татын туж урод. Тани али кынтэм бере гинэ кӧня ке ветлыны луэ. Нош зор куазь луэ ке, татчы пыраны воксё уг луы».
Вадим Трефилов Полевой урамын улӥсьёс пӧлысь одӥгез. 9 ар ини воргорон котькуд ӵукна но ӝыт та сюресэз лёга. Резинка сапегтэк тати ветлыны уг луы. Сокем дэри но нод луэ. Нош машинаен — веранэз ик ӧвӧл.
ВАДИМ ТРЕФИЛОВ, ДЭБЕСЫСЬ ПОЛЕВОЙ УРАМЫН УЛӤСЬ: «Озьы ик каллен ветлӥськом. Кышное бамперзэ магазин бордын кельтэ ни вал. Отын туж бадӟым гоп каремын ни вал. Кин ке отчы щебёнка кисьтэмын ни. Таксистъёс как бы не соглашаются довозить народ, отказываются, секыт пырыны, сюресты ӧвӧл шуыса. Ульча пумозь могут, а отӥяз — пыдын».
Полевой урамысь сюресэз тупатыны кемаласьгес ини татын улӥсьёслэсь сюрс манетэн коньдон бичазы. Но туннэ нуналлы сюрес нош ик быремын ини.
ЛЕОНИД БЕЛЫХ, ДЭБЕСЫСЬ ПОЛЕВОЙ УРАМЫН УЛӤСЬ: «Мон в общем то ичи ветлӥсько но, ведь пиналъёсын ветлоно. Соосты садике каждый ӵукна нуоно, ӝытазе ваёно. Пиналъёс школае таӵе сюресэтӥ ветло. Лэсьтын уг лэсьто нокызьы но. Ма, бадӟым машинаос мыно ке дак, сыӵе колея луэ отын. Легковой машинаосын тоже уд пыр ни отчы».
Та югдур гинэ ма — урам югдытэмын но ӧвӧл. Али нуналъёс вакчиесь, ӝог пеймыт луэ. Урамлэн кутсконаз гинэ кык лампаос югдыто. Ёрос администрация секыт югдурез вала — Выль Ар бере ини Полевой урамын лампаос пуктозы — оскытӥзы кивалтӥсьёс. Туэ Дэбес черкогуртысь урамъёсты югдытонлы оглом 500 сюрс манет висъямын луоз. Сомында ик толалтэ сюресъёсты лымылэсь тазатонлы кошкоз. Но Полевой урамын туэ сюрес уз выльдӥськы.
ВЕНИАМИН СЕРЕБРЕННИКОВ, "ДЕБЁССКОЕ" МУНИЦИПАЛ КЫЛДЫТЭТЛЭН ТӦРОЕЗ: «Мыдӟатлы тани опять ик планэ включитьтэмын именно Полевой ульча, Нефтяников ӵош, кудӥз кык урамъёс уродэсь, да отиез более-менее. И мыдӟатлы планэ включитьтэмын, мыдӟатэ за счёт республиканского бюджета ик ми сое лэсьтомы».
Озьыен, вуоно арын сюресэз тупатъян ужъёс Полевой но Нефтяникъёслэн урамъёсын кутскозы. Вуоно арын элькун бюджетысь солы 1 миллион манет висъямын луоз.
Вероника Ваулина, Любовь Волкова, Юрий Зелененький, «Мынам Удмуртие» телеканал
Комментарии
Отправить комментарий