Элькун Тӧролэсь ужзэ быдэсъясь Александр Бречалов Алнаш ёросын тодматскиз та вакытэ ужась предпрятисоын но ёрослы азинскыны луонлык сётӥсь выль площадкаосын. Соос пӧлын – «Варзи-Ятчи» санаторий. Со 300 шутэтскисьёслы чакламын но азьланьын ужзэ паськытатыны чакла. Озьы ик элькунлэн кивалтӥсез вуылӥз фермерлэн Владимир Сергеевлэн вал вордон фермаяз. Владимир Сергеев 15 ар талэсь азьло ужзэ мытӥз 80 гектар музъемен, 2 тракторен но 1 комабайнэн. Та вакытэ солэн 2 сюрс гектарлэсь ятыр гырон-кизёно муосыз, 340 сюро таза пудоез, 35 пӧртэм техникаез. Аслаз коньдонэныз но "Семейный фермер" программа улсын грантъёсын кык ферма выльдэмын, лэсьтӥське вылез ферма но вал вордон гид. Нимысьтыз удыс — зеч выжыосысь валъёсты вордон. Соос Росси ӵошатсконъёсын 6 кубок утӥзы ни. Соос пӧлын — Казань ипподромын ортчылӥсь "Дерби" ворттылонъёс. Фермер Элькун Тӧролэсь ужзэ быдэсъясьлы но экспертъёслы ивортӥз ваньбур поттонзэ паськытатонъя малпанъёсыз сярысь. Солэн чакламезъя, нимысьтыз техника басьтыны кулэ капчиятэм кредитъёс. Озьы ик Удмуртилэн улосвылаз туала комбикормъёс поттонэз радъяно. Соос дунзыя но ӟечлыксыя вожвылъяськыны мед быгатозы бускель улосъёсысь Татарстанысь но Марий Элысь сыӵе продукциен.
Комментарии
Отправить комментарий